暑假旅行齊充電

    最多敎師公務員

    租車自駕遊歐洲

    安全做足無憂愁

    暑假到，又是旅遊旺季，旅行社朋友可忙矣。

    每年此時，敎師、學生、公務員成外遊生力軍，敎師假期長，一般都會趁機充電，藉此增廣見聞，奬勵自己。有些學校為加強凝聚力，暑假組織敎師及家屬旅遊，長線視為世紀大旅行，西歐遊過再玩東歐，每年幾乎都出trip，實際見識會比普通人多。至於公務員，勝在假期長，保安部隊人員遠遊有津貼，唔去好蝕底，不少人趁暑假帶同妻兒旅行合家歡。

    有朋友歐遊擬自駕，也好，唔使畀導遊牽鼻走，最煩帶購物，嘥時間。

    自駕遊，須租車，手續簡，只要有國際駕照，碌卡搞掂。持航空公司貴賓卡者，有些租車公司會提供優惠。歐洲租車服務甚普遍，服務點逾三千，有些一出機場便見到，最出名有Hertz、Avis、Enterprise等，乃國際連鎖公司，有保證。最好事先查閱歐洲租車網，貨比三家，預訂或到埗辦手續，可睇情況執生。

    自駕遊海闊天空，時間由己掌控，去到邊，玩到邊，出車前準備足，便毋須像旅行團般趕鴨仔。歐洲車設有衛星導航，跟箭嘴走，同行幫睇地圖，一般唔會走錯路，除非導航壞鬼。

    朋友齋遊西班牙，仲易搞，由巴塞羅那駕車到馬德里，車術好者，朝行暮到，中途還可以在小鎭遊覽，領略鄕鎭風情。遊過馬德里，不妨揸個零鐘頭車往托萊多，此一中世紀山城古氣盎然，河流環繞，很有氣勢，城內多購物店舖，拍友街頭巷尾有排影，但小心蕩失路。

    租車不是問題，最重要還是安全第一。身處異地，人生路不熟，加上交通右上左落，揸慣右軚者突轉左軚，點都要十分鐘適應。初時須一眼關七，高速公路尙無問題，遇城市複雜路面，無論切線或讓先，都要搞清楚，切勿開快。

    另方面，歐洲各國路牌與英文有出入，大多水蛇春咁長，司機唔易睇，就得靠同行者幫眼，事關行錯路，再兜回原處，可能要花一個鐘。做足安全準備，定必玩得開心又放心。

    羅倫斯